القائمة الرئيسية

الصفحات

كورونا : هذا سبيطاركم تيشبه ليكم.. رسالة لاصحاب داوي خاوي!

(هذه تدوينة صادمة.. لا تتابع القراءة إذا ما باغينش تخلع، خصوصا مع الجايحة والحجر الصحي، هانتوما معلومين )

في الأيام القادمة، سيصاب ناس من عائلتك بالفيروس او أنتم انفسكم به.. حفظكم الله وشافاكم.

 قد يطلب منك الطبيب أن تأخذ الدواء وتحجر على نفسك في منزلك. احرص على عزل نفسك وعدم نشر العدوى.

وقد يقرر أن تبقى في حالة استشفاء.

في المستشفى، ستكون غالب الأحيان وحيدا، وحيدا ستكون (دخلها لراسك مزيااااان... دخلها مزياااان لراسك).. لا زيارات ولا تردد كبير من طرف الممرضات.. أكاد أجزم انك لن ترى كائنات حية إلا أربع مرات في اليوم .. الممرضة مرتين والمنظفة مرة والطبيب مرة في اليوم.. غادي يبان ليك سراق زيت مرة مرة.. احطارمو عافاك.. راه قدم منك تما..   إن حالفك الحظ ستستمتع بصوت سيكيريتي وهو يفرق الجوقة في المستعجلات..  هذا عادي وجاري به العمل في دول العالم (الثالث) ككل... ما تقلقش ومن دابا ماخصهاش تجيك غريبة..

أكثر من ذلك عزيزي،  لا تطلب الممرضة إلا في حالة الاستعجال او الخطر .. ولا تستغرب اذا رأيتها تشبه رواد الفضاء وتبالغ في اجراءات الحماية ولا تقترب كثيرا، فهي ملزمة قانونا وأخلاقيا بحماية نفسها قبل علاجك.. لا تستغرب اذا تأخرت، راه غير باش تلبس اللبسة خاصها ربع ساعة، وباش تحيدها ربع ساعة أخرى .. وبطريقة علمية وفيها معالجة نفايات طبية خاصة..  زيد عليها داكشي غالي يا حبيبي بل مفقود من السوق..  ولا تشتكي من طبيب يكلمك من مسافة بعيدة.. راه ماشي حبوبة ف القلم هادي.. وفي داخل المصلحة، نرجو أن تلتزم قدر المستطاع بسريرك ولا تتجول كثيرا حتى لا ينتشر الفيروس.. حارب الملل بالدعاء والصبر ودي معاك شي حاجة تقراها وراديو صغير.. القضية مطولة حبيبي.. أما التيليفون، فرآه خرجو عليكم أصحاب الفيديوهات الأولين.. دابا تقدر تدخل ثلاجة معاك هانية ولكن تيليفون لاأح (بصوت كبور) ماخطا إلى كان نوكيا 3310.

إذا ساءت حالتك لا قدر الله، سنعتني بك في الإنعاش.
الانعاش المغربي هو سرير والة تنفس وآلات أخرى.. سنأخذ لك برا ديال صيروم، وواحد الأنبوب في الجهاز البولي ديالك، وكوشة فين دير كاكا، وواحد الخيط فيه جوج عوينات في المنخار تايسوطو لاكسجين غير بشوية..اذا بقيتي فايق، راه دانون عمرك ما شفتي الماركة ديالو واللووبية الباردة وسمكة التونة العنيدة من نصيبك، هنيئا لك اخي المسلم.. لذلك، القفة ضرورية تجيك من الدار.. اما اذا عولتي على ماكلة سبيطار راه مللي تخرج محال يعرفوك مالين الدار.. حيت ما غاديش تبقى تشبه لصورة لاكارط.. 

في حالة ساءت حالتك لا قدر الله أكثر، صدقني عزيزي، انت لا تريد أن تعرف الباقي !
(إن كنت تصر على المعرفة راسلني على الخاص.. هناك فقرة VIP محذوفة حفاظا على .. شيء ما!)

وطبعا، كولشي فايت.. غادي تولي بيخير وعلى خير ان شاء الله.. وتكبر وتنساها.. هكذا يقولون.. لكنك لن تفعل .. غادي تبقى فاكرها حياتك كاملة.. غادي يعقدك هاد سيجور في سبيطار وغادي تنقل العقد ديالك لاولادك وبناتك.. وغادي تحلم بيه بحال الكابوس والمصيبة ما غاديش تقدر تعاود اشنو طرا إلا بالنسخة اللي كتريحك أنت.. والمصيبة الثانية والواعرة انك من بعد ماغدي تدير حتى حاجة باش أولادك ما يعانيوش من نفس المصير الأكحل .. إذا تمجهدتي كاع غادي تدير شي تعليق في شي نهار على صورة ممرضة وتقول ليهم ناري شحال غليضة.. شوفو مصبغة اضفارها وطالقة شعرها..

هذا جهدك -أخي المواطن- راه قريناك وعرفناك ما فيدكش وما نعولوش عليك ف شي تغيير جذري وحقيقي .. بحالك بحال حليب لحمارة نعاماس.

آخرتها مشايخة كيف قالو دكالة لوالا. لذلك، الله يرحم ليك الواليدين #بقا_فدارك !

فقط سيدي وسيدتي الكرماء.. نلفت أنظارهم أن المستشفى العمومي لا يتوفر على تلفاز ولا ويفي ولا على دوش بمياه ساخنة وستكون محظوظا إذا وجدت دورة مياه صالحة للاستعمال الآدمي وأكله زي الزفت ومياهه غير صالحة للشرب ورائحته كريهة وموظفيه غير محفزين ومرعوبين أكثر منك وإدارته غير كفأة وتتسامح مع المرتشين والمطبلين..

الشيء الوحيد الذي ستجده مرتاحا ويعمل بجد ونشاط في المستشفى العمومي هي كاميرات التجسس على الموظفين.. نظرا لقلة العاملين.. لا تغرنك كثرة الطابليات البيضاء ..راه كولشي تايلبسهم دابا .. من تريسيان وسماسرية حتال البروفيسور.. 

لذلك عزيزى المواطن اليوتوبور، بلا ما تمثل علينا ما كونتيش عارف الوضعية الكحلة للمستشفى العمومي، وتدير فيديو دير بيه الضغط عل  سيستيم صحي .. هادشي ماشي وقتو.. انت وانا عارفين ان الميزانية قليلة وخدامين غير مع أصحاب راميد وباك صاحبي.. يعني حتى واحد ما تايخلص الا من رحم ربك وبالتالي مداخيل المستشفى قليلة، وتحويلات الحكومة كذلك،  إذن عادي جدا أن خدماته تكون ضعيفة..

نزيدك حاجة أخرى، غادي تفاجأ بيها والمصيبة راه عارفها.. المقاول اللي شاد النظافة داهن السير .. مقاول اللي شاد مارشي كليماتيزور حتى هو داهن السير.. واللي دار أشغال الإصلاح.. واللي شاد المالكة.. واللي شاد الحراسة والجردة والبيوندري.. يعني هاداك اللي خاصو يراقب راه مغمس في المرقة الوقت مللي كونتي أنت وانا معاك تنتفرجو في ارطغرل وراقي بركان.

أما المنتخبين و البرلمانيين، كولشي ساكت حيت الإدارة تتهلا في ناس ديالهم اللي كيصوتو عليهم في الانتخابات.

اما ما نقوم به اليوم من تطبيل للأطباء والممرضين، فهو يشبه ضرب الدفوف من طرف أمهات المسلمين في حروبهم ضد قريش في فيلم الرسالة،  أي فقط لتحفيزهم على دخول المعركة بأسلحة سوفياتية مهترأة..  وباش شرفاء الميدان ما يحطوش السلاح.. وباش كوفيد التاسع عشر ما يحيدش لينا السروال صديقي العزيز.

هادشي فايت اصبر شوية .. مللي يفوت اجي معانا ندافعو على الحق في الصحة ومستشفى عمومي ديال بالصح.. باراكا عليك من اخبار حمزة مون بيبي ولا لا العروسة وفيديوهات ايلومناتي والسحر الأسود .. راه غير الخوا الحاوي!

عقل عل  كلامي أ بوراس.. عقلي على كلامي أ مُّوراس! 

زهير ماعزي، فاعل حقوقي و جمعوي.
هل اعجبك الموضوع :

تعليقات

تعليق واحد
إرسال تعليق
  1. أنا من داخل الميدان وأرعبتني
    لكن ليتهم يقرؤون

    ردحذف

إرسال تعليق